廸士尼嚟咗對黑白雙煞，隨時取代布魯圖同高飛嘅地位。黑色嘅叫Guinness，三歲；白色嘅叫Maggie，兩歲，都係拉布拉多犬，上年10月受訓後，入廸士尼做保安，四圍索吓有乜可疑物品。
據講，兩隻嘢好有性格，Guinness生性活潑，Maggie就比較內斂。大家下次去廸士尼，有機會撞見呢兩位保安員，佢哋身上有名牌，各位不妨同佢哋打吓招呼。
絲襪有指定顏色
嚴格嚟講，黑白雙煞嘅膚色應該係黑色同肉色，即係廸士尼演藝人員嘅絲襪指定顏色。廸士尼認為，只有透明黑色同肉色嘅絲襪，先襯得起演藝人員嘅制服，啡色、灰色同深藍都勉強可以，但係鮮紅鮮橙，或者零舍有魅力嘅魚網絲襪，一律嚴打。
廸士尼鼓勵着黑絲，仲有保養貼士提供，先將絲襪浸喺凍水，然後連盆放入冰箱，雪幾粒鐘後拎出嚟曬太陽，對絲襪會更耐用。不過八方擔心，以後雪櫃嘅食物，會唔會多咗種難以抵抗嘅「味力」呢？