隔牆有耳:答問直銷大會 - 李八方

隔牆有耳:答問直銷大會 - 李八方

世界難撈,自言做過「孤獨推銷員」嘅煲呔都要重操故業。噚日答問大會,平時罕有發問嘅劉皇發向煲呔提問,要求政府提供誘因,促使中小企喺金融海嘯下繼續請人,發叔建議政府提供稅務優惠,甚至免稅。
發叔係鄉事界代表,咁關心中小企利益背後原來有原因,佢隨即申報利益,話自己間新酒樓今日開張,身為老闆,所以關心政府中小企政策。哦,八方即刻明晒,原來有人藉煲呔過橋,趁機賣廣告!煲呔話要幫助中小企,俾人抽水都冇得詐型。

煲呔疑似「狗噏」

發叔同八方講,佢喺屯門新時代廣場有個舖位,一直租畀戲院,戲院最近摺埋,於是佢收回吉舖自用。食肆面對逆境叫苦連天,煲呔都驚農曆年後有執笠潮,發叔點解咁勇爬逆水?佢話自己做開飲食生意,做生不如做熟啦,加上唔使捱貴租,相信較易圍皮。新酒樓擇吉今日中午12點開張,請飲食界張宇人剪綵,唔請高官,唔知係咪怕咗曾班子霉氣感染,影響生意。
湯家驊則鬧政府押後政改諮詢,質疑又係北京主意,煲呔話唔會同對方「監硬辯論」呢個問題,好多人聽到煲呔講「狗噏辯論」,鬧出特首疑似狗噏疑雲。

吹氣香蕉變道具

嗰邊廂發叔插科打諢抽抽水,社民連就明目張膽喺議事廳賣廣告,毓民、長毛、陳偉業,輪流攞住會喺今年年宵市場賣嘅吹氣香蕉同毛毛香蕉雙截棍做發言道具。幾大電視台現場直播答問大會,社民連唔使幫襯賀年廣告套餐,分毫不花就做咗個productplacement廣告,呢條橋都算絕。所以話呢,睇嘢唔可以只睇表面,社民連先至老謀深算。煲呔慘成人肉佈景板,成場苦口苦面,無奈過以前做孤獨推銷員。
答問大會淪為電視直銷大會,下次大家識轉台啦。噚日仲有個漏網鏡頭,社民連同財爺鬍鬚曾「過蕉」。話說正式開會前陳偉業將一隻毛毛蕉掟向鬍鬚曾,身為甄子丹師兄嘅鬍鬚曾眼明手快,一手接蕉,隨即運勁將隻蕉掟向長毛,長毛反應快接住,鬍鬚曾幫唔到煲呔報仇,可惜!

mailto:pf_lee@appledaily.com

鬍鬚曾向長毛還蕉,可能想為煲呔報仇。
孔慶初攝