日本漫畫配英文？西版真人電影《龍珠》未變「超西」已經夠西，知咩事啦！由NAMCOBANDAI製作嘅PS3《火影忍者：終極忍者風暴》，之前返咗美水版，雖然好多人讚遊戲畫面靚過TV版，不過完全乏人問津，Fans話噚日出街嘅行貨日文版先原汁原味；須知查英文字典，係無Naruto呢個字㗎！
文：㩒釘華
一人飾兩角合作連技
鳴門打到敵人吹飛，之後立即轉小櫻出場，凌空飛鋤，打到落花流水。
通靈巨獸大戰夠迫力
岸本齊史嘅少年漫畫《狐忍》打鬥夠爽快，仲有埋仙術、通靈巨獸，唔係一味揦把刀劈劈劈放飛鏢，咁先係日本忍者小靈精！今次PS3出呢隻動作Game，係近年勁興嘅3DToonShading，即係2D卡通畫配3D玩法，玩緊嘅時候好似睇緊動畫咁，啱晒動漫迷胃口。
而試玩過之後，發現最有迫力都係對通靈巨獸嘅Boss戰，例如鳴門大戰我愛羅變成嘅尾獸，鋼手隻活蝓加自來也隻文太，大戰大蛇丸條萬蛇，真係習齊晒雪蛤、海參、大蛇齊晒?寒冬玩仲夠晒滋補㖭。
簡單指令合作技
𠵱家玩Game最緊要夠爽，一上手就玩得，仲得閒同你練左兜右兜連續技咩。狐忍打打吓時就會喺畫面出現一啲指令，只要跟住㩒，就可以出到華麗必殺技，例如有啲場面要出螺旋丸就要連㩒「O」掣，好鬼簡單，但又幾鬼緊張。
除必殺技外，合作技都唔難出，有啲場面你可以隨時㩒R1換人，咁當你打到敵人吹飛時，就可以即㩒R1換人去收Place，畫面勁有速度感，爽！
101個任務上網增角色
今次狐忍有多個模式可選，分別係故事模式、任務模式、對戰模式等，除故事模式外，最好玩當然係任務內嘅MiniGame，有時叫你打爛啲嘢，有時要你用最快方法閃人等等，合共有101個任務，真係有排你玩。
暫知行版遊戲收錄了25名登場角色，而已推出嘅美版更已有追加劇情、角色供下載，行貨一定唔會少，所以耐玩程度都好高。今年農曆年無乜正Game玩，呢隻就啱砌啦！係最衰無得Online雙打啫。
《火影忍者：終極忍者風暴》
推出日期：已出
類型：動作
機種：PS3
價錢：$428
查詢：i-Gamer（27253338）
