小店大感動 燉BB頭蘋果世界一

小店大感動 燉BB頭蘋果世界一

經常有雜誌大字標題「酒店級甜品」,標榜酒店甜品廚師自立門戶,用料都是高級貨云云。事實上,不少都是求其焗個心太軟、梳乎厘,就當作招牌菜,食完一次無回頭。真正不惜工本,要數在天后新開的「甜品大少」,原個日本世界一蘋果拎去燉、一支紅酒只煮三個梨,平均四十蚊就令你食到開心晒,連醫生錢都慳番,令人感動!

記者:吳允冲
攝影:楊錦文、梁世權
Model:Ceci@StageModels

原個燉夠三人吃

燉蘋果、燉梨不是新鮮事,將整個BB頭般大的世界一蘋果放入燉盅燉,都是老闆阿倫才想到:「我做咗十幾年甜品,唔想做同出面一樣嘅嘢,所以搵咗最頂級的材料嚟做。」成本七十元,價錢才八十元,份量大得足夠一家三口吃,不愛蘋果亦可揀燉日本南水梨,價錢平一半,一樣咁滋潤。

雪耳燉世界一蘋果$80

用上雪耳、龍眼、龍杏、南北杏加原個日本最大顆的世界一蘋果燉足兩個鐘,最啱像現在的亁燥天氣潤喉,果肉腍雪耳爽,帶點點像巨峰提子的微酸。每日限量發售。須一日前預訂。

一支紅酒只煮三客

店內主要提供大路的西式甜品如布甸、心太軟、芝士餅,但味道有驚喜,因師傅不怕工夫多,亦捨得用靚材料,像一道紅酒浸比利時長梨,一支智利Merlot紅酒只夠煮三客,還要煮足兩個鐘,一般街坊甜品店邊會咁花心機?筆者都替他擔心究竟有無錢賺。芝士餅看似平平無奇,其實加了Bailey’s咖啡酒,酒含量20%,入口初時只感受到香濃的法國芝士味,慢慢Bailey's的味道滲出來,最特別是餅底,怎可能那麼鬆脆?原來是混合了幾種餅,還加了肉桂,不但是只用消化餅壓碎。就連伴碟的生果,也經過精心配搭,如芝士餅旁的新鮮杏脯,焦糖燉蛋配安琪梨、牛奶布甸配藍莓,不過賣相太精美,很多人以為是裝飾而不吃,記得不要錯過。

法式焦糖燉蛋$35

用原條呍呢拿籽,不用香精,入口即溶,全憑燉的時間掌握得好,面頭的焦糖做得薄、脆而不燶,食得出師傅的真功夫。

Bailey's芝士餅$35

混入Bailey's,入口酒味不強,但咖啡酒餘韻久久不散。

紅酒浸比利時長梨$40

煮過的紅酒酒精已揮發,剩下是果味,長梨肉腍中帶爽。

ACupBabyCeci口話減肥,卻將甜品全部掃清:「我特別鍾意法式焦糖燉蛋,真係好滑呀﹗

甜品大少(31753868)
天后銅鑼灣道144號新發大廈地下

情侶熱捧
九龍城心太軟

在九龍要找「酒店級甜品」,必選九龍城的甜蜜居。酒店出身的王師傅做了甜品近40年,招牌作心太軟用上72%的法國朱古力,切開香脆的面層熱辣辣的朱古力岩漿流出,伴上冰凍雪糕,好吃得連森美都話感動!難得是地方寬敞,全都是卡位,不似九龍城其他甜品店般逼逼狹狹。甜品份量夠大,吸引不少女仔拉埋男友來吃,也適合一班朋友飯後來hea。

■王師傅堅持用靚料,並即叫即整。

呍呢拿梳乎厘$35

熱辣辣上枱呍呢拿香味四溢,焗得鬆軟而不過濕,外層能脆點更好。

心太軟$35

真正外脆內軟,朱古力甜而不膩,全因用上貴價的法國朱古力。

特色榴槤慕絲$37

用泰國金枕頭榴槤,內裏是蛋糕及新鮮榴槤茸,啖啖滋味。與榴槤奶露一樣,都屬店中人氣推介。

甜蜜居(27161489)
九龍城南角道4-6號地下