牛：輸死人呀！輸死人呀！
畢：因乜事大嗌？
牛：周中英足盃輸死人，個人心水伯明翰、彼德堡同布里斯托城全軍盡墨。
畢：我都貼咗伯明翰，諗住佢哋主場有威力，點知連蛋都破唔到，淨輸0:2。
牛：信飛又死，彼德堡主場對西布朗，由受讓平/半，臨場轉到平手低水，出邊有啲莊家開到彼德堡讓平/半，結果又係輸0:2出局。
畢：西布朗近況好似有啲起色，周六英超護級大戰，西布朗主場對米杜士堡，你又追唔追西布朗先？
牛：我就唔信佢哋有兩嘴嘞！睇番佢哋贏彼德堡陣容，可以話精銳盡出，貝特拿、格寧、卡臣等主力全部正選；講真處於英超榜尾嘅西布朗，以佢哋人腳，點都求聯賽護級，總好過爭英足盃，我都唔知領隊莫比點諗。
畢：不過米杜士堡又幾令人失望喎！有我欣賞嘅端基同艾卡，但不經不覺已9場波未贏過。
牛：米堡長期唔贏波，西布朗主場連勝曼城同熱刺，要讓平/半，死都唔信，我就要米堡嘞！
畢：呢場我就冇咩心水，今期突然想踩吓藍鑽石意甲地盤，要AC米蘭主場對費倫天拿開「大」。
牛：點解咁有信心先？
畢：基拿甸奴重返聖西路肯定做嘢，AC班老鬼上場對羅馬尾段又莫晒氣，我估要再失波。
牛：好，不如就整口2串1，米堡下盤過AC「大」，大家攜手合作收錢啦！