富豪身家縮水，內地胡潤研究院噚日出咗09年「至尚優品──中國千萬富豪品牌傾向調查」，發現富豪理財投資成熟咗，經過海嘯洗禮變得理性同保守，而佢哋對金融服務機構嘅口味亦轉咗啲，最青睞嘅私人銀行，由上屆嘅高盛變咗滙豐；中資銀行就始終情繫招行（3968）。
投資銀行 高盛贏出
胡潤今年第5年公佈「至尚優品」調查，據講係面對面問過345個中國千萬富豪，當中131個仲係身家過億㖭，受訪嘅富豪平均年齡41歲，男女比例79：21。結果？最得呢班富豪尊崇嘅金融服務機構有招行、滙豐、恒生（011）、工行（1398）、中行（3988）。
滙豐呢兩日係咁俾人唱，股價跌到66蚊，但仍係外資行中，最受中國富豪青睞嘅外滙理財銀行同私人銀行，前一個獎仲第三次冧莊，後一個獎上年由瑞銀攞到，胡潤話「瑞銀因在金融風暴遭受巨額虧損導致品牌形象受損，而滙豐銀行表現穩定」。
投資銀行方面，前一年攞獎嘅滙豐，今年輸畀高盛，不過高盛上年9月宣佈，由投行轉型做商業銀行。家陣時勢變得好快，只能講此一時彼一時囉。
反而招行過去3年都穩贏人民幣理財銀行同信用卡發卡銀行兩個獎，有咁多富豪撐，招行董事長秦曉面對海嘯都可以安心啲。不過工行都唔弱，攞到新設嘅人民幣理財銀行最佳表現獎。
投資房產 比例急升
股市勁跌，調查發現富豪投資股票嘅比例少咗15%，投資房地產反而多咗8%，而且唔再好似以前咁一味冒險，家陣會揀避險能力較高嘅投資方法，而且投資傾向主動同理性。呢個係咪見過鬼怕黑呢？
李華華
mailto:[email protected]
09年中國千萬富豪最青睞品牌
至尚優品金融服務獎項：人民幣理財銀行
機構：招行
至尚優品金融服務獎項：外滙理財銀行
機構：滙豐
至尚優品金融服務獎項：私人銀行
機構：滙豐
至尚優品金融服務獎項：信用卡發卡銀行
機構：招行
至尚優品金融服務獎項：信用卡
機構：VISA
至尚優品金融服務獎項：個人理財銀行最佳表現*
機構：恒生
至尚優品金融服務獎項：人民幣理財銀行最佳表現*
機構：工行
至尚優品金融服務獎項：信用卡發卡銀行最佳表現*
機構：中行
註：*最佳表現獎指受青睞程度急升
資料來源：胡潤