外資減持內銀股一浪接一浪，蘇格蘭皇家銀行一次過沽清手上中行（3988）股份，不過中行冇跌，反升2.7巴仙，有缸邊友話，外資連番減持內銀股之後，減持行動應該差唔多，所以當好消息炒。不過外資係咪就咁收手，真係好難講。
港股反彈，但係高位沽壓唔細，滙控（005）被大摩唱淡，70元一度失守，最後報收70元，恒指最後只升得36點，收13704。
國壽C輪15377：國壽（2628）昨收22.55元，升2.5巴仙，股價連續第2日守住條50日線，有機會回試100日線，破位就睇26元，可以諗吓隻C輪15377，昨收31仙，有效槓桿3.9倍，輕微價外，正股升上26元，15377可見52仙，正股跌穿21.30元，就沽咗隻輪止蝕。
俊樺