灣仔區議會下周二討論合和二期道路改善工程方案，議員是否收貨將左右合和50億大計。2004年城規會審議合和二期前身MegaTower時，性格直率嘅合和主席哥頓胡應湘親自披甲上陣，去完城規會又去區議會，更同長春社代表公開激辯，場面非常火爆。
胡文新料到區議會應戰
哥頓近年淡出，悉心栽培太子胡文新接班，將興建合和二期呢個重任交晒畀佢，據講太子會代父出征，親自去灣仔區議會接受質詢。胡文新性格比老父溫和，唔打硬仗卻好識得玩溫情，公關手腕了得，凡事有商有量，過去半年除咗同發展局局長林鄭月娥傾掂數，令合和二期火速上馬，仲親力親為落區去灣仔中小學軟銷合和二期對社區好、對下一代好。
合和噚日開始大規模公關攻勢，太子親自搵人氣笑匠詹瑞文上鏡，拍短片宣傳合和二期對灣仔有利冇弊。哥頓有兩大心願，一個係合和承包興建港珠澳大橋，另一個係睇到合和二期落成。大橋夢泡咗湯，唯一寄望係合和二期，太子當然不能有負老父厚望啦。