金融海嘯百業蕭條，香港人冇閒錢外遊，外國人亦然，因此旅發局要度橋吸引遊客，八方聽聞旅發局最新idea，想將香港打造成「髮廊港」、「亞洲髮型中心」，因為好多內地闊太、大腕二奶、三奶，原來都好鍾意嚟香港剪髮。專程嚟香港剪髮，當然唔係幫襯一百幾十蚊消費、師奶林立嗰亭屋邨髮廊，而係中環名師名店，洗頭過千蚊，剪髮最低消費幾千蚊嗰種高檔salon。如果內地大款湧晒嚟剪髮，真係俾煲呔講中，香港想唔發都難！
想搞「優質髮廊計劃」
旅發局想搞個「優質髮廊計劃」，先要搵人親身體驗服務水準，過關先會頒發優質Q嘜證書，旅客見到Q嘜先幫襯就至穩陣。旅發局主席田少官仔骨骨，頭髮永遠梳到立立令，由佢測試不作他選，正所謂田少都幫襯，包保冇搵笨！
要將香港打造成「髮廊港」，必須有個「基本髮」，邊種髮型代表到香港呢？八方覺得「掃把頭」係首選，最好情商葉劉重塑掃把頭，繼續護髮；其次係肥姐個「開心果」髮型，大家睇咗幾十年，真係睇開有感情。潮流之選有《家好月圓》紅姨個Bob頭，想懷舊則可揀筷子姊妹花個高頭大髻，一見到自然識哼幾句"Kowloon,KowloonHongKong"。
制訂基本髮唔到香港人話事，要全國人大常委拍板，掃把頭係大熱門，因為阿爺睇得最順眼，開心果髮型都有機會，事關係香港人集體回憶。如果北京真係聽民意，最好梗係進行普選，一人一票選出代表香港嘅基本髮啦，若阿爺欽點掃把頭，隨時又有50萬人上街呀！
田少應幫旅發局改名
想當年改革開放之後，無數香港人北上掘金，搵到錢要消費娛樂，令珠三角遍地髮廊，處處髮花，造就深圳、珠海、東莞城鎮經濟奇蹟；改革30年，風水輪流轉，估唔到香港調轉頭要以髮廊救港，為免髮廊港爛尾，唔講等於不存在，八方認為應該設立機構專責吸引女遊客來港剪髮，旅遊發展局一於改名「女遊髮剪局」。
mailto:[email protected]