近日備受分手傳聞困擾的陳道然（蘭子），早前客串賀歲電影《家有囍事2009》，劇情交代她向古天樂飾演的心理治療師求助，最終鼓起勇氣向林子聰示愛。蘭子呻今趟跟古仔對手戲太少，又不能跟他鴛鴦戲水，煞是失望。
谷德昭執導的賀歲片《家有囍事2009》，除了有吳君如、古天樂和鄭中基孭飛外，還邀請了蔡卓妍、陳道然和林子聰等客串。其實蘭子在電影《家有囍事》中都演過黃百鳴的情婦，大唱《金絲雀》一曲，故此今次《家》片拍第三集都盡量召集上集演員助陣。
古仔在片中扮演心理醫生，專治女性情傷，有情聖封號。有次他接獲蘭子求助，古仔遂帶她到沙灘作心理治療，還鼓勵她向獵物出擊，正好蘭子看中肥仔聰，在一鼓作氣下主動獻媚，更替肉騰騰的肥仔聰搽太陽油。古仔見蘭子重拾自信，便功成身退，獨自享受嬉水之樂，並乘機大晒弗到漏的身形。
蘭子曬燶肌膚
蘭子表示今次客串演出，片酬甚低，但獲導演肥谷安排她與古仔有不少對手戲份，她昨在電話笑說：「呢場戲就當做bonus，不過我哋對手戲太短，應該安排啲鴛鴦戲水。𠵱家淨係得古仔有得落水，我就要喺沙灘亁煎，都真係好dry吓，猛烈陽光仲累到我曬燶晒皮膚，搞到我冲凉都痛咗成個月。」
蘭子又大讚古仔靚仔，她說：「平時透過螢幕睇佢冇乜嘢，但真人面對面，真係好令人震撼，好彩我喺呢行見過好多靚仔，定力夠。」談到替肥仔聰搽油一幕，她笑說：「嗰日太熱太曬，如果換轉呢幾日咁凍去拍，我實攬住佢唔放。」
採訪：比華利