NBA球隊火箭後衞麥基廸又多一個花名啦！繼「容易受傷的男人」、「翠絲小姐」後，今次係「冇腰骨男」！點解？咪因為佢間唔中就以養傷為由，拒絕上陣囉。當周二火箭血戰48分鐘，以100:105僅負湖人後，相信在場近18,000名主隊球迷心入面都會諗，點解年薪近1.6億港元嘅麥基廸，可以咁冇承擔？
姚明忍無可忍
今季火箭係威係勢，諗住有「火爆男」阿達斯加盟，加埋姚明同麥基廸，「3巨頭」有機會挑戰總冠軍啦；殊不知29歲嘅麥基廸養傷多過食飯，最衰係佢自稱喺「每日觀察名單」（day-to-daylist），又話同教練艾度文有共識，可以打一場、唞一場，呢種咁唔負責任嘅「職業球員」，真係教壞細路！
踏入1月，老麥第一場對速龍打，第二場對鷹隊又傷，之後對76人又打、對塞爾特人又傷。大佬，你叫隊友點夾你呀？難得呢位火箭「1號仔」仲大大聲話腳傷未好番，每次跳起同埋快攻，成個人都硬晒喎！
我求大俠間唔中都有打籃球，亦試過負傷繼續比賽，所以最憎啲冇鬥心嘅球員；好似麥基廸呢種隊友，換轉我求大俠真係「車」個波埋去都似。難怪早前同佢「稱兄道弟」嘅戰友姚明，都喺NBA官網度爆，話唔想再見到佢，費事要估佢今晚會唔會出場！
高層錫住T-Mac擺款
冰封三尺，非一日之寒，麥基廸搞到咁大牌，火箭管理層都有責任。好似周二火箭總裁莫雷（DarylMorey），就出嚟為老麥「解畫」，話麥基廸狀態未足，為免佢身心受創，都係畀佢休息番兩個禮拜再算。
想當年T-Mac自製撞板入樽、對住馬刺最後35秒連入13分嘅英姿，真係分分鐘勁過高比仔；估唔到今時今日，會俾球迷怒斥「冇腰骨」。T-Mac，你幾時先醒呀！