港股「龜仙人」陸東日前喺新書發佈會度，預言人民幣10年內會自由兌換，到時港幣就會消失。華華諗咁香港人咪冇咗身份象徵？
曾經參與制訂聯繫滙率、兼有「聯滙之父」之稱嘅祈連活，噚日一聽到有記者問佢對港幣會唔會喺10年內消失嘅睇法，即刻好勞氣咁話，根據基本法，中央會維持香港50年不變，即係話喺2047年之前，港幣仍然會係本港嘅法定貨幣，咁又點會喺10年內消失呢？
祈連活仲話，聯繫滙率制度實施咗25年都冇問題，𠵱家根本唔係適當時間將港幣同美金脫鈎。華華覺得祈連活咁講都啱，但香港自從97年回歸後都變咗好多，唔知港幣同人民幣可以共存到幾時？