上星期日冇馬跑，於是中午十二時仍然在家，睇完NBA一場水鬥水球賽（芝加哥公牛對奧克拉荷馬雷霆），就轉台睇「城市論壇」講中學教學語言，當日《明報》有全文刊登中大教育學院教授曾榮光之「香港家書」，詳盡分析當今之教學語言問題，十分精彩，《明報》又同時引述港大教育學院講座教授程介明：「學校必須中文書用中文教，英文書用英文教。」至於城市論壇之討論，因限於時間，幾位校長、教師的話只能說了一半，搔不着癢處。
以前沒有母語教學政策之時，香港學生家長冇咁重視中中與英中之別，特區政府強行欽點一百一十間學校為英中之後，有咗標籤效應，中中收生遇上困難，又碰上學生人數日減，縮班殺校之壓力隨之而來，於是中中校長教師無不怨聲四起，過去十年不少教育界之爭論事，多由此而來。
孫公登台，一反前人作風，一於逐步淡出母語教學（但唔敢開宗明義講到明──取消母語教學政策），實行教學語言微調，讓學生壓力逼使中中逐步轉軚，此招甚為陰濕，預料中中難以抗拒，逐漸舉手投降。至於用英語教英書，用英語教通識，討論家暴條例，講建築文物承傳，是否有足夠嘅講英語教師，啲教育高官點會知道吖，佢哋只識唱高調而已。英語教師的標準係中學會考取得英文C級，簡直係大笑話。
肥仔K讀中學時在地區band1英文中學就讀，除咗英語科老師英文頂呱呱之外，其他各科數理化、地理、經公等科，皆全用英文書，但老師講廣東話多過講英語，佢哋班同學好多入咗中大、港大、科大，英文考C者，不在少數，但港大理科畢業後，叫佢哋用英語講半小時物理、力學，肥仔K評論話：「佢哋未必做到程介明嘅要求喎！」現實啲講，用中文教英文書，考試以英文作答，係香港幾十年來之普遍教學傳統，只有極少數名校例外，而呢批名校之成功唔多唔少係建築於家長之痛苦上（如家長為子女做功課、搵補習先生）。曾榮光教授在新亞讀書年代，就係英文書中文教之產品。