短炒資金似見離場，港股跌勢持續，13800點失守，創近一個月以來新低。大市連跌六日後累跌約1900點，換言之，今年初的升幅已經「跌凸」！港股走勢已轉壞，估計今次調整目標約在12000。
昨日提及的中國旺旺（151）雖逆市上升3.6%，收2.87元，但仍維持原先睇法，應對策略不變，畢竟現時股海氣氛麻麻，加上農曆年假將至，如果真係冇炒作對象，散戶大可不必勉強自己入市。
候低吸持中線
濰柴動力（2338）踏入09年，股價一度升至16.80元，上周五出現裂口低開後，走勢已轉弱，昨續跌1.6%，收報14.40元，估計要試50日線（現處約13.71元）支持，失守機會亦大。
由於近日整體國企股表現差勁，H指已跌破升軌支持，濰柴難獨善其身，短線未宜撈貨，建議等跌至10元水平才考慮吸納，作中線持有，目標28元。
方星俠