國家副主席習近平巡視澳門後，據說正在廣東考察。領導人到訪，澳門方面如臨大敵，長毛等人想到澳門示威，當然被拒諸門外，同屬社民連嘅阿牛曾健成卻獲網開一面，參加東區區議會珠海考察團，竟然獲發通行證過關。
阿牛自參加反對臨立會大聯盟後，已多年不能北上，呢次佢報名參加考察團，預咗食白果，詎料有關方面咁大方。呢個考察團不談政治，主要與珠海市政府官員交流市政管理經驗，區議員睇吓當地市政設施，據稱賓主交流氣氛融洽，阿牛並冇玩嘢乘機抗議。
今次容許阿牛北上，是否代表內地同民主派關係解凍呢？又未必，因為公民黨余若薇建議立法會環境事務委員會到廣東考察，廣東省人大常委會卻話近期工作繁重，請佢食檸檬。