國寶級鋼琴大師劉詩昆近嚟似乎諸事不順，日前涉嫌打老婆蓋燕要提堂，單官司未審完，劉大師又惹是非。八方收到一個嚟自內地佛山嘅投訴，涉及大師嘅鋼琴藝術學校。
佛山係詠春大師葉問嘅故鄉，不過今時今日父母可能唔想仔女學武，好多人反而要子女學彈琴。任太透過長途電話同八方講，佢個13歲囝囝任凌楓，細細個已顯示天才潛質彈得一手好鋼琴，由於好仰慕劉詩昆，所以幾年前慕名拜入佛山劉詩昆鋼琴藝術學校門下。舊年7月，任凌楓仲嚟香港參加校方舉辦嘅「詩威德盃」香港少年兒童鋼琴賽，結果凌楓表現出眾，喺兩個組別都攞到一等獎。
贏比賽收唔到獎品
「大會講明贏咗就會送一部價值25,000蚊嘅鋼琴，凌楓應該得到兩部，但𠵱家仲未收到！」任太話，大會解釋有人投訴凌楓就讀星海音樂學院附屬中學，而比賽規定，在內地就讀頒發專業文憑嘅音樂學院者唔可以參賽，所以大會只係頒一等獎畀凌楓，唔係有鋼琴做獎品嘅特等獎。
八方翻查網上資料，確係有呢條比賽規則，不過任媽媽則話報名表冇咁寫，而且劉詩昆鋼琴藝術學校兩年前，喺佢個仔考入星海時曾頒發榮譽獎，任太指學校既然明知凌楓讀星海音樂學院附屬中學，點解報名參賽時冇人提醒佢，比賽後先至話有問題，枉費凌楓心機。
揚言要告學校索償
「我個仔好唔開心，幾個月唔肯練琴，佢哋就咁毀咗佢一生。」任太氣上心頭，講嘢難免誇咗啲，亦可能係佢誤會咗學校，但為咗個仔，阿媽不惜千里𢱑鋼琴，一片苦心可以理解。其實細路仔學琴，最重要係享受彈琴樂趣，為咗獎品而彈琴亦好冇意思。八方致電香港劉詩昆鋼琴藝術中心，職員話應該搵內地負責人查詢，八方打電話去佛山，不過冇人聽，亦聯絡唔到負責嘅蓋燕。
任太聲言要控告藝術學校，要求索償相等兩部鋼琴價值50,000蚊，仲要20,000蚊精神損失，佢強調唔係求財，「律師費都唔只啦，我要討回公道！」
mailto:[email protected]