陳太離開立法會呢個政治舞台後，轉戰學校。陳太早前表示會到中學演講做人做官做議員道理，初時打算只做一個學期，點知學界反應甚好，至今已有逾百間學校邀請佢，以每星期一場計，預計要巡迴講足兩年，隨時忙過之前，據講連陳生都投訴，為乜見老婆一面咁難。
學生問點睇掟蕉
陳太噚日去觀塘基智中學做首場演講，有近800師生捧場，陳太以「一國兩制、民主與管治關係」為題，解答有關普選同功能組別嘅問題。當中有學生問陳太點睇毓民掟蕉，呢個學生，八方懷疑係社民連fans，亦有可能係高登網民。
陳太話唔贊成議員掟蕉，認為議員應該以身作則，好似學生咁，聽到校長說話唔啱聽，都唔可以掟鞋掟蕉。坐喺陳太身旁嘅校長聽到，即場擰擰頭兼搵隻手擋面，好搞笑。據知呢間學校曾邀請社民連陶君行演講，遲啲會請埋毓民㖭。陳太演講完後有個surprise，800個師生一齊唱生日歌預祝佢今個月17號69歲生日，陳太個四萬笑容好燦爛。