《海角七囗》在台灣上映113天，大收四億六千萬元新台幣，力逼《鐵達尼號》成為台灣史上最賣座電影，在港開畫首日奪票房冠軍，緊隨其後的《渺渺》、《九降風》、《停車》和三月在港上映的《囧男孩》，均以勝利姿態踩入香港，2009年影壇，是這股台電風的世界？
記者：蒙為亮
攝影：陳陶鈞
鳴謝：Kubrick
Dora（辜俊萍）
曾為TVBI以及驕陽電影的推廣及發行工作人員，2008年自立門戶開設了曙光電影公司，買下《海角七囗》以及連同三月將會在港上映的《囧男孩》等。
馮家明
1995年畢業於香港中文大學藝術系，影評散見於《電影雙周刊》、《信報》及《明》等，2001年起在百老匯電影中心、藝穗會、香港國際電影節、大專學院主講電影，現為香港影評人協會會員及香港電影評論學會理事。
馮=馮家明 D=Dora
七位數字博一博
這股台電風有幾厲害，我說沒說服力，有請《海角七囗》香港發行商曙光電影公司負責人Dora及資深影評人馮家明出場，台灣電影為甚麼可在港大展拳腳。
馮：上年可謂台灣電影翻生嘅一年，雖然未必套套電影都好似《海角七囗》咁厲害，但套套電影都有港產片所無嘅特色。以《海角七囗》為例，嗰份鄉土情懷同地道人情味，我敢講上年無一套港產片可以媲美。
D：哈哈，其實我都係因為呢份鄉土情懷，所以決定買呢套戲，而且仲用咗好多錢㖭。
馮：幾多錢先？
D：大概七位數字，上年十月，我過台灣諗住買《囧男孩》，有個台灣朋友話我知有套《海角七囗》好爆，票房收兩億。由細到大我都未入過台灣戲院睇戲，咪姑且睇吓囉，我一睇就好鍾意，差啲感動到喊，所以決定博一博，好彩最後都成功買到呢套片。
馮：點解話博一博呢？
D：博一博有雙層意義。首先爭到套戲番嚟已經係個嘗試，到爭到番嚟喺香港上映，仲要成功估中香港人口味，又係另一個嘗試。你係影評人，你應該好清楚，香港人睇戲口味好古怪，有時外地啲大片大製作，往往一到香港就變成票房毒藥，好似《集結號》同《瘋狂的石頭》，我自己都覺得好好睇，但喺香港上唔夠一星期就落畫。
馮：哈哈，確係有咁嘅情况，不過《海角七囗》喺呢方面掌握得好好，港人都好鍾意劇情同音樂，所以完場嗰陣，少有地有觀眾睇埋Endcredit先走，呢個情況香港好少見。
D：呢種應該就係台電風嘅魔力，聽朋友講，《渺渺》都出奇地收得喎。
馮：係，《渺渺》都係賣一貫台式青春味情懷，其實呢種岩井俊二式日本美學，打從《夏天的尾巴》到《最遙遠的距離》已經貫徹始終，所以有一定捧場客，反而《九降風》令我最驚喜，佢擺脫一貫侯孝賢、楊德昌嘅陰陰森森，唔只有青春有活力，仲有種難以言喻嘅成長苦澀位。唔知點解，呢類校服電影，呢兩三年喺香港無聲消失，香港只容得下大片格局，無小品無青春片，所以好難怪台灣電影攻陷香港。
失落金馬獎之謎
上年台灣金馬獎賽果令《海角七囗》擁躉失望，成功台灣本土創作，卻得不到自己人認同，也許應該阿Q精神地學Wyman講一句：「我寧願有人為我攞唔到獎不值，好過攞到獎，有人覺得我唔值。」
D：當晚我都有去台灣出席金馬獎頒獎典禮，由頭到尾成個Show都用《海角七囗》包裝，連茂伯都換過三件衫，點知都輸……
馮：有朋友陰謀論認為，如果《海角七囗》得獎，台北資金會南移，所以惟有頒畀《投名狀》。我咁睇啦，要睇評審係台北定台南人囉。
D：我反而覺得，可能有關方面怕《海角七囗》太成功，一旦得獎就好難為日後電影定位，所以做咗個咁嘅決定。
馮：上年嘅台灣電影的確脫胎換骨，早幾年大家淨係識Copycat，不斷重複拍攝手法，完全忽略故事發展，《海角七囗》成功在故事枝節都發展得好完整，每條伏線都形容得好細緻。
D：我買片嗰陣都心大心細，諗過度過，要睇靚仔靚女，男女主角掂，講音樂，套戲又絕對唔失禮，要搞笑有茂伯同田雞。
馮：講到令全場觀眾都笑嘅笑位，一定係小演員喺電梯入面唱《愛你愛到死》嗰幕，三個男演員當場O晒嘴，哈哈。
D：數最感動位，係最後婆婆拆信一幕，作為最愛賣弄言情嘅台灣片，都可以拍得咁瀟灑，真係難得。
馮：俾着港產片，可能仲會好老土咁用黑白畫面交代回憶㖭，哈哈。
擋不住的台風
台片氣勢強勁，覆蓋觀眾層面也廣，相比香港只有《赤壁》、《投名狀》、《風雲》等過億製作費大片，一味只用錢堆砌，令人失望。
馮：香港電影有啲回塘Feel，出現斷層，令台灣電影有更大生存空間，𠵱家只有大片同王晶式商業片，Sell校園情懷、純愛情甚至其他題材嘅小品，只可以喺電影節搵到。
D：我都係捉緊呢種人有我無嘅心態買電影，三月上映嘅《囧男孩》喺台灣大熱，小朋友做主角嘅電影一向有市場，不過行內好少呢類片，對上一套已經係新加坡嘅《小孩不笨》，我覺得《囧男孩》更加搞笑。
馮：除顧及賣唔賣得外，仲有無其他因素影響你引入其他片種？
D：我鍾意睇戲，遇到新片，一定要睇晒成套戲先決定買唔買，唔會因為單純喺台灣收得就買。近期有套《1895》，係部講日治時期台灣民初嘅電影，𠵱家喺台灣大收，但呢套片只單純講台灣文化，所以就算買，我可能只會出DVD都未定。
馮：講開DVD，有套台灣片我高度推介，叫《練習曲》，佢用紀錄片形式講男主角揸機車環島遊，環島遊喎，香港一定拍唔到啦，我一向鍾情台灣，就算男主角唔靚仔，齋睇風景都殺晒。
後記：
有電影人說香港也需要一部《海角七囗》，我不認同，香港需要的，應該是一套本土情懷味濃的電影。盲目抄襲快速玩謝是香港文化特徵，當務之急應是向多方面發展，不漠視大片商業片對業界的貢獻，但小品類卻不能無影無蹤，百花齊放，才是東方荷李活吧。
台風吹起……
1.《海角七囗》片長130分鐘，沒大卡士，講幾個小人物組成雜牌樂團的故事，以七封情書跨越六十年時空，越簡單越感人。
2.《海角七囗》熱帶動台南旅遊事業，不少港人也因為看過電影，萌生往恆春、墾丁遊覽的念頭。
3.樂團成員有失意Band友阿嘉、交通警勞馬、汽車修理工水蛙、老邁的「國寶」茂伯、賣酒的外鄉人馬拉桑、十幾歲的女童大大。
4.《海角七囗》奪第四十五屆金馬獎最佳原創電影音樂，唱片公司推出精裝版答謝觀眾支持，鐵盒包裝，值得入貨。$120（1月20日發售）
風勢持續強勁……
