經濟下滑，物業成交量大減，地產代理搵食艱難。外資代理行第一太平戴維斯啱啱喺噚日公佈業績，08年喺代理業務方面有1.62億稅前盈利，比07年嘅1.8億，少咗一成；仲預測今年市況更差，代理業務收入會再少20至30%。
其他員工薪金不變
佢哋董事總經理李偉文為咗同員工共度時艱，公佈「肥下瘦上」政策，董事級人員一律減薪7至25%，其他員工薪金維持不變，預計可以慳到20%成本支出。
公司同時話，今年進一步集中做多啲非代理嘅業務，包括物業管理、商場裝飾設計同佈置；又研製防止牆身滲水嘅納米油漆，仲攞埋專利。新研發嘅垂直種植植物法，已經同政府簽埋合作協議，幫手美化公路兩旁嘅隔音牆，希望幫補到減少咗嘅佣金收入，令總盈利唔會大跌。
喺咁艱難時期，李偉文話公司舊年雖然盈利係少咗，但始終有錢賺，搵到錢就要同員工一齊分享，鐵定下個星期二喺九龍灣展貿設宴160圍，提早團年。