有六十年歷史嘅工聯會今年4月改選領導層，該會有不成文慣例，立法會議員不能兼任理事長，因此做咗理事長近九年嘅KK黃國健要退位讓賢。
邊個有機會接棒呢？KK同八方講，做理事長最緊要得到各屬會支持，而且要有威望，佢估計現時領導層中，最少有四、五個人有機會出選，至於邊個係大熱門，佢好口密唔放風。
八方明查暗訪，工聯會內唔少人都認為現任副會長林淑儀接任理事長機會最高。林淑儀係全國政協，喺工會資歷甚深，論資排輩非佢莫屬，若佢當選，就係工聯會首個女性理事長。林淑儀老公係民建聯議員黃定光，以前有人笑言黃定光係商人，因此林淑儀階級成份不純正，唔適合領導無產階級喎。