金融海嘯令好多有錢佬身家唔見一大截，買嘢亦豪情不再，搞到唔少名店生意大減。不過，以生產靚車馳名於世嘅林寶堅尼，舊年生意依然好掂，所以今年會逆市擴張。反映車同女人一樣，只要係靚，幾時都唔驚冇人吼。
林寶堅尼行政總裁溫克爾曼話，雖然業務有受金融海嘯影響，喺美國呢個最大市場少咗20%生意，但好彩中國內地、南韓同中東市場撐住，令全年銷量仍有1個巴仙增長，達破紀錄嘅2430架。內地市場銷量由前年28架，急增1.6倍至舊年嘅72架，增長潛力驚人。
祖國舊年賣多1.6倍
溫克爾曼又講，雖然經濟好差，但會維持每年為兩座位汽車換款嘅傳統，費事班擁躉失望，集團今年亦打算喺全球開多10間代理行，專攻受金融海嘯打擊較細嘅市場，方便啲新貴富豪睇車同落單。