最近收到一個消息，敏妮以前個上司離開咗世界，其實近呢年已經聽到佢患上cancer，由於身體好弱，朋友探佢都冇精神招呼，所以敏妮只係同佢電郵聯絡，一直都冇親自去探望佢。
敏妮呢位前上司其實好注重健康，記得當年敏妮初出道時，想快啲學到多啲嘢，所以做嘢都算博㗎，經常搞到過晒食飯時間，同事每每幫敏妮買個燒味飯盒。每當呢位上司行過見到敏妮嘅燒味飯，就會擰晒頭話：「敏妮，咪成日食埋啲junkfood啦！」諗唔到正值盛年嘅佢，咁快就離開世界。
平常心面對裁員減薪
金融海嘯，大家都擔心工作不保收入銳減，但好多嘢唔係你可以控制，所以都係用平常心面對，始終健康最重要。
講開裁員減薪，家陣個市做投資理財嘅就最遭殃，敏妮成日都收到讀者問，家陣讀CFP仲有冇出路？敏妮亦同搞CFP課程嘅朋友傾過，發現近呢兩期開嘅CFP課程真係少咗人報讀，係咪同海嘯有關？相信點都有啲。敏妮都係嗰句，認可資格嘅嘢，考定冇壞，尤其金融方面嘅專業資格，因為除非呢個世界冇人投資，否則個市起起跌跌，係一個循環。
話說回頭，公餘讀書唔係個個都咁有恒心同毅力，所以興趣好重要，好似敏妮咁，興趣係搵錢嘅話，讀CFP就唔覺係苦事。不過，如果唔鍾意計數，「求學只係求分數」，敏妮反而忠告唔好夾硬嚟，因為真係俾你考到個資格，同人做理財plan，都唔會用心嚟做，到時分分鐘鐘更多雷曼苦主出現。
專業資格無分行業
其實，好多大家睇小嘅行業，都係一門專業，好似敏妮除咗考CFP牌，其實亦想考個咖啡師牌。日後就算開唔到咖啡小店，去咖啡連鎖店都應該唔怕冇人請！
溫敏妮
http://wanmanli.com/blogs/