西曆聖誕節與新年假期過後，已經係○九年一月五日，剛好係小寒，農曆十二月節氣，返工一個星期之後，大家已經心思思，開始買年貨，準備過年，於是又有老友詢問團年日子、開工吉日。有人問到，左丁山循例叫佢哋去睇梁玳寧專欄，但佢哋話錯過咗喎，請左丁山代問玳寧大姐。好彩玳寧姐素來與人為善，有好事就鍾意與別人分享，對左丁山講：「我唔會收你版權費。」跟住傳真過嚟幾頁資料，係香港研究易學會傅會長嘅牛年預測。
首先代各位多謝梁玳寧先。今日已經係年十九，訂位吃團年飯唔知仲有冇位，不過大記者到apm名店吃晚飯，飯店經理鬼咁肉緊咁叫佢：「嚟多啲啦，隨時打電話畀我。」或者反映到今年好多人慳啲使，飯店年夜飯生意未必有舊年咁好。團年飯日子根據通勝、傅會長之言，與幾本左丁山睇過之牛年運程書，都話首選係年廿九（一月廿四日星期六），年三十（一月廿五日）適值歲破，故此不宜，如要提早，可選年廿六（一月二十一日）。
過年後開工又如何，政府機關與大機構一律於假期後一月二十九日年初四返工，打工仔難避免，但盲公陳話：「如相信擇日學問者，最好不用此日。」年初五係好日，但吉時係由子時至卯時，辰時中，巳時凶，即係話趕住返工嘅話，最遲都要在早上九時前趕返公司，適合早上班之人。咁就不如揀年初八（二月二日星期一），此日吉時由卯時至到巳時，早上十一點前返工，好他條啫。左丁山就揀呢日正式開工嘞。
至於牛年犯太歲，傅會長指牛（丑年生）、羊（未年生）、龍（辰年生）、狗（戌年生）皆犯太歲，會長指牛人提防受傷及注意健康，探喪問病，可免則免；羊人會奔波勞碌，最好賒借免問，留意消化系統和肌肉毛病；龍人易生訟，被人針對，要注意長輩的健康。狗人易被篤背脊。上述四類人士宜佩戴鼠圖銀牌，勿隨意動土。以上各種說法，信不信由得你。寫到呢度，醒起一位讀者來函，話自己係年青學生，問如何可以拜紫微楊為師習技。紫微楊肯唔肯收徒弟，左丁山唔知，恕難幫忙了。