環球金融海嘯雖然令好多賓架黯然離場，但亦有唔少人成功轉工，繼續喺金融界搵食。好似資深財資市場人士Wilson陳鳳翔，早排離開花旗私人銀行後，華華收到消息，佢老兄上個禮拜已經喺上海商業銀行返工，職位係副總經理，主管財富管理業務。
市差專注高端客
華華打電話向佢老闆──上商常務董事兼行政總裁郭錫志求證，郭生證實Wilson已經加盟該行。雖然雷曼迷債令客戶聞投資產品色變，監管框架亦越嚟越嚴，金融海嘯亦令好多人身家唔見咁一截，剩低冇乜幾多財可理，不過郭生就話，唔同市場環境下都有生意可做，銀行都要吸納人才，善用本身資產負債表，喺合適風險管理下，專注高端客戶嘅理財拓展喎。
陳鳳翔81年投身財資界，最初任職廣東省銀行（現已併入中銀香港），炒房歲月第一個師傅，應該係中銀香港（2388）現任副總裁林炎南。95年Wilson轉投工銀亞洲（349）。至07年7月，再加盟花旗私人銀行部，由sellside轉型buyside。