八方噚日路過中環，空氣濁不可耐。環保署喺中環同銅鑼灣錄得嘅路邊空氣污染指數，都係「甚高」，即係話此地不宜久留。不過，香港人都應該慣晒呢種烏煙瘴氣，尤其係90年代先出世嘅後生仔，都冇乜幾可見過青天。
叫大家反思污染問題
連天文台長林超英都有感而發，佢今期嘅《台長網誌》仲好似怪香港傳媒後知後覺，佢話1997年天文台首次發出新聞稿，講到香港能見度越來越低嘅問題，當時冇乜傳媒報道，頭版報道嘅只有《新晚報》，後來仲停刊埋㖭。
根據天文台統計，香港一年能見度低於8公里嘅時間，由1988年嘅300小時，激增到2004年嘅1,600小時。台長話，家陣香港人已經好少可睇到地平線上嘅日落，正常嘅日落由於少見，變成「疑似特殊天文現象」。台長仲叫大家反思一下，近20年究竟發生咗咩事？我哋可以做啲乜去遏止情況惡化？
今年退休嘅林超英可能忘記咗一樣嘢，天文台係隸屬商務及經濟發展局嘅，掛唔掛八號風球都要諗過對經濟影響先。民間對空氣污染問題已經反思到冇嘢可以再反思嘅地步，若然台長咁關懷個青天，好應該拜見吓佢老頂劉吳惠蘭，叫佢反思埋一份。