吳彥祖和女友LisaS.前日難得有時間雙雙拍拖遊車河大晒恩愛，怎料卻和隔籬線的私家車發生誤會，一向性格火爆衝動的吳彥祖和LisaS.竟向對方做出不文手勢，令隔籬私家車的司機及乘客感到受辱，雖然吳彥祖即場道歉，不過卻被指誠意欠奉。
鬼聲鬼氣的吳彥祖和名模女友LisaS.，前日甜蜜地駕駛黑色私家車一齊遊車河，但卻和隔籬線的私家車發生誤會。昨日本報接獲讀者梁先生的投訴指吳彥祖和LisaS.先後向他做出不文手勢。
平排停車質問
梁先生指前日在大埔道近北河街駕車時遇到隔籬線的吳彥祖駕駛黑色私家車，梁先生表示由於該馬路其中一條行車線正封閉，而梁先生的私家車則在另一條行車線向前慢駛，吳彥祖的座駕準備切線駛過梁先生那條線。
梁先生在電話中說：「佢架車當時喺隔籬線第二架，當我哋架車喺另一條線駛過咗個修路位之後，吳彥祖架車亦都跟住切線駛過，之後佢駛前喺我哋左手邊，見到佢突然向我哋舉中指，由於前邊係紅燈，我哋兩架車平排，佢身邊個鬼妹仔再做出反V，跟住吳彥祖開窗問我哋點解唔讓佢切線，我咪問佢點解要做粗口手勢，佢就話咁唔好意思囉，之後就走咗。」
吳彥祖認𤷪𤺧
梁先生強調並非因為他是吳彥祖才投訴，而是因他們做出低劣行為，而且道歉也沒有誠意，所以才拍照記錄他和女友的不當舉動。記者昨日聯絡LisaS.，但她的模特兒公司表示她正在錄影，到截稿前仍未回覆，而吳彥祖則透過助手回應：「係有呢件事發生，現場我見對方唔肯讓其他車過，其實平時我唔係亂發脾氣，不過當時真係好𤷪𤺧，我之後都有講唔好意思。」
撰文：葉雪
