經紀A指出：「恒指喺二○○八年十二月三十一日係14387點，○九年一月二日開市之後連升兩日共一千一百幾點，繼而連跌四日，於是恒指喺星期五收市報14377，比舊年收市仲低咗十點，你話趁開市紅盤就入市嘅話，已經蝕埋交易費用，可見股市十分波動，好難搵食；故此我研究一番之後，認為電盈私有化有值博率：（一）私有化價四元五角與上星期五收市價三元七角二仙有大差異；（二）如果我買咗，我就有資格投票贊成私有化；（三）𠵱家唔知幾時會投票，估計唔會太耐（按：後已宣佈於二月四日投票），根據上次私有化未加價前嘅資料披露，股東特別大會之後約三十幾日就可以收錢。嗱，當係前後三個月嘞，投資三個月有回報率21%，計年率就有84%，基金經理都搵唔到咁高回報嘅投資啦！」
左丁山又潑冷水：「係咯，基金經理咁識計數，佢哋唔識撲落去，等你呢個散戶撲？一定係人哋知道啲嘢你唔知啦！市場冇理由咁笨！」經紀A講：「凡事講值博率嘅啫，人人諗法唔同。睇報紙報道，上次○八年十二月三十號電盈投票通過押後法院會議，以便從新考慮私有化價錢由四元二角提升到四元五角，當時贊成嘅出席股東有77%，反對有22%；贊成押後股東特別大會嘅有99%，睇呢啲贊成數字，我可以推論為大部份股東會贊成私有化，私有化成功機率係高嘅。諗嚟諗去，買定八號仔等私有化成功，博得過，好過你成日追韋達。至於啲基金經理點解唔一早掃貨，畀個機會我，我都費事諗。總之信自己嘅感覺與分析！」按道理，電盈嘅基金股東冇理由唔乘勢套現，佢哋嘅持貨量老早marktomarket，虧損一早入咗數，現有人出價四個半，基金贊成嘅話，賺硬。如果佢哋要貨唔要錢嘅話，點樣向背後投資者交代？至於散戶就難估啲，講計數就容易，講感情就無從推測，或者就因為散戶難測，所以啲基金經理先至唔敢大舉入貨賺差價。經紀A話佢以前從未有買入電盈，左丁山亦然。呢啲咁嘅套戥利潤，純粹以數字推算，當係腦筋遊戲亦無妨。