花旗股市氣氛麻麻，噚日港股繼續走低，未到農曆年假，市場已經充滿假日氣氛，投資者入市興趣唔大，成交都係得462億元，所以恒指就算低過14000關收市，仲未可以睇得太淡。個市成交咁奀，大戶暫時都係舞高弄低嚟搵食。
農曆長假期前，港股嘅變化可能唔會好大，主要都係受花旗股市左右，不過成交就可能繼續淡靜，不利港交所（388）。
港交所P輪15138：港交所噚日報收74.75元，跌4.4巴仙，10日同20日線都失守，50日線喺70.34元，係淡友嘅目標，若跌穿呢個位會再踩落56元，可以諗吓隻P輪15138，昨收26.5仙，有效槓桿1.6倍，正股跌落56元，15138可見39仙，正股升破83元就沽咗隻輪止蝕。
俊樺