近期早飛倉唔多精神，上周二小弟貼赫斯未能命中，上周五畢傑兄貼桑坦德亦損手。賭仔有秘訣，當你手風唔順之際，就要搵更弱嘅人「做燈」；今次一於搵「病虎」侯城做燈，捧佢對家紐卡素可以主場贏波，在英足盃晉級。
一度上過英超第3嘅侯城，季初無限風光，不過近期完全打回原型，變番隻病老虎；聯賽已4連敗，之前作客大敗予曼城1:5一役，領隊菲爾布朗諗住用一招破釜沉舟，中場休息時喺球場中圈向球員訓話，結果不單冇激起球隊鬥志，反而更令軍心一沉不起。英足盃第3圈時，縱有主場之利，對紐卡素都冇甜頭，結果雙方賽和0:0，今次更加要作客，更不值睇好。
紐卡素無疑近期都唔係好出色，上仗只主場迫和韋斯咸；不過紐記傷兵問題已有改善，奧雲狀態冒起，小將安祖卡路爾亦有信心。睇番近季英足盃第3圈重賽戰果，都幾利主場，上季12場重賽中，有7支主隊可以法定時間贏波晉級，包括紐卡素在重賽以4:1大勝史篤城晉級。既然作客都唔輸畀你，今次喺聖占士公園，紐卡素一於打低呢隻「病虎」晉級。
唔信西維爾又贏拉科
配腳方面，西維爾係小弟近期最摸唔通嘅球隊，對馬略卡、奧沙辛拿呢啲中下游球隊贏唔到，但又可在西盃同聯賽兩勝拉科魯尼亞；今次西班牙盃16強次回合，拉科回師主場，以首回合輸1:2，今次唔係冇得追，我唔信西維爾可以3連勝拉科，博拉科次回合贏番場。另一場西盃次回合賽事，貝廸斯近期聯賽不濟，既然首回合已有1球領先優勢，對住丙組仔皇家聯盟相信以守為主，入球細可取。
牽牛
早飛王貼士
星期三19紐卡素vs侯城
首選 紐卡素勝（1.8倍）
次選 紐卡素和[-1]（3.45倍）
周中波焦點
星期三1
阿德萊德聯vs昆士蘭獅吼
澳職前列大戰，受惠威靈頓鳳凰失分，「阿聯」已穩得季後賽資格，但仍有保榜首必要：第3位的獅吼屬澳職作客王，贏波便可確保季後賽資格。
星期三21
曼聯vs韋根
曼聯只要今仗勝出，便可升上英超第2位，球隊近期防守力出色，聯賽已8場不失波；韋根上仗憑補時階段入球，1:0小勝熱刺，取得聯賽4連勝，但往績對曼聯極差。
早飛倉
主菜：星期三19紐卡素勝（1.8）@2,000
渾水摸魚過關：星期三11貝廸斯細（1.75）x
星期三12拉科魯尼亞勝（2.45）x星期三19紐卡素勝（1.8）3x1@500
今日早餐價錢：$2,500
上日賺蝕：-$2,500
早飛倉結餘：$97,274
規則：$100,000本錢，每日買早報最多動用$5,000，最少$1,000，逢周二、五見報。