噚日獅子行公佈一項有關保險嘅調查，由個人理財業務部存款及財富管理業務主管Bruno李錦榮主講。佢卡片上嘅title同以前唔同，華華記得，存款業務本來係由另一靚女主管Diana施穎茵睇，過往獅子行出招推存款或定存優惠就會見Diana，所以華華即刻諗，唔通獅子行出現人事變動？
問番至知，原來舊年12月獅子行出咗內部通告，重整個人理財業務架構，今年1月開始，Bruno就會兼多一職，主管存款業務，至於Diana就主攻銷售方面工作。
重整個人理財業務架構
華華不得不讚一句獅子行早着先機，金管局要求銀行優化管理業務、建議傳統、投資、保險三大業務分家嘅報告，舊年都未公諸於世，獅子行已經率先重組業務，怪唔之得當日亦甚有見地，冇賣雷曼投資產品啦！