內銀股呢排冇運行，皆因外資大行手上嗰批喺05年買落嘅pre-IPO戰略股份，揸咗咁耐終於夠鐘「解禁」沽得。因買入價平到笑，佢哋點沽都有錢賺。巨無霸中行（3988）率先捱打，瑞銀喺除夕夜前掟晒手頭嘅33.8億股H股。一星期後又輪到建行（939）中招，美銀同樣以配售方式狂掟56.2億股H股。之不過，點計都唔夠「超人」李嘉誠出手，向來睇準高位出貨嘅佢，名下基金喺1月7日，以折讓價7.5%「披醒」20億股中行H股，散戶又點敢唔跟。
金魚缸風聲鶴唳，噚日內地《理財周刊》引述消息話，靠QQ起家嘅騰訊（700）主席馬化騰，大手買入招行（3968）。買幾多就唔知，因為未夠5%股份唔使公諸於世。馬總過去呢年已經幾次因為「個人理財需要」減持騰訊，夾埋套現咗6億幾港紙，至於買招行係咪屬實，佢公司發言人就話唔知老細係直接買，抑或代人買，總之無可奉告喎。