AC米蘭教練「肥安」安察洛堤外表笨實，實質精甩髀！周日聯賽AC作客2:2和羅馬，佢背住良心呃球員、呃球迷，臨時轉軚派碧咸正選上陣，利用「萬人迷」金漆鞋油，擦亮老細貝盧斯科尼對臭皮鞋！
太冇腰骨啦！「肥安」上周六開記招，大大聲話：「碧咸踢得，不過好難有正選！」周日輪到老細貝盧斯科尼講：「我係『肥安』嘅就會畀碧咸打，如果唔『弗』可以下半場先出，我會喺電視機前睇實。」呢個「肥安」即刻投老細所好，仲畀埋個正選碧咸㖭！
老細下旨臨場變陣
事後，「肥安」仲猛咁兜：「我之前同球員講過派碧咸打正選，因為佢操練時體能狀態都好好；不過為免佢太大壓力，大家都低調處理。」碧咸賽後一時興奮踢爆「肥安」講大話：「我好意外！賽前開會先知道有正選打！」「肥安」，想呃我求大俠都夾好啲口供啦！
其實，「肥安」擦老細鞋早有前科。佢一向鍾意「聖誕樹陣」（雙進攻中場加單箭頭），好似當年雷哥斯達同李華度嘅拍檔咁，點知貝盧斯科尼鍾意雙箭頭，結果肥安跪晒地，重用恩沙基拍舒夫真高。哎！正所謂跪得一次，就有第二次，久而久之變奴才，今次「肥安」索性改埋名做「安擦落鞋」！
大家咪誤會，我求大俠唔係歧視碧咸，畢竟佢打足89分鐘，精神實在可嘉。數據方面亦過得去，64次傳送成功率84%，重要傳送得一次；係12次傳中成功率得8%，令人失望，不過總體嚟講收貨啦。AC亦憑柏圖梅開二度，打和有胡仙歷入兩球嘅羅馬。
派路唔交波無聲抗議
「肥安」講大話擦老細鞋，不過我求大俠知道派路夠正直，唔會助紂為虐。兩位老友藍鑽石同守丹都異口同聲話，成場波派路都刻意唔畀波碧咸，寧願踢高波越過對方直接畀隊友，似乎用行動反對「肥安」派碧咸落場。其實，今時今日AC淪為老人馬戲團，「肥安」腰骨唔夠硬絕對係主因！
不過諗深一層，又難怪「肥安」嘅，攞住碧咸呢盒名牌鞋油，更係擦靚貝老闆對皮鞋啦。因為佢婚姻情場失利，如果職場都失意，慘變雙失中年漢，就慘啦！