每逢將踏入新一年，坊間例必有好多新一年股市分析發佈，其中有幾多成準？恕星俠唔得閒去統計，畢竟家陣稍有一點「股齡」的散戶，都未必會將呢類分析睇得太上心，而且有些分析聽完後都唔知究竟想點？例如最近有人話09年港股會繼續尋底，但又唔會跌至去年10月10676個底位。究竟咩叫「尋底」？
下試2.5元密集區
中國旺旺（151）踏入09年後股價即失守3元，家陣仍未有止瀉迹象，昨續跌2.5%，收報2.77元，10日線已向下跌穿50日線出現死亡交叉，料短線跌勢未完。
事實上，旺旺08年3月上市價3元，但上市以來最高都係見過3.62元，唔算好「叻」。以目前走勢判斷，料該股後市將考驗2.50元密集區，若失守，跌勢或加快，短線未宜沾手。
瑞銀剛發表報告，指中國旺旺產品去年第四季銷售增長已放緩，雖維持「買入」評級，但目標價只係得3.50元。
方星俠