澳門今年換特首，喺未上演投票選舉呢場大龍鳳之前，阿爺梗係要做足工夫。國家副主席習近平啱啱結束揀蟀之旅，但究竟屬意邊位人選，至今仲未洩漏一言半語嘅口風，或者露番幾吓暗示嘅散手。不過，噚日終於有料到，向來口疏愛漏料嘅賭王再次扮演預言家，一錘定音咁話：「睇好崔世安！」
睇阿爺頭狂讚崔世安
習副主席上周末訪澳期間，記者問親佢有關下任澳門特首人選嘅問題，佢都笑而不答。大家惟有金睛火眼聚精滙神咁參與呢個其實幾無聊嘅估領袖遊戲，例如用秒錶計算佢同邊位握手握得耐啲，或者新華社、中新社發邊張相等等，結果令人失望，冇人參透箇中玄機。
噚晚賭王何鴻燊攜同三太陳婉珍同三房長女超雲出席東華慈善餐舞會，成班記者見到佢好似螞蟻摟蜜糖咁圍埋去，除咗問佢對台灣開賭嘅意見，就係問對習副主席訪澳之行嘅睇法。大家都知，身兼全國政協常委嘅賭王除咗係澳門舉足輕重嘅人物，對阿爺嘅眉頭眼額亦向來觀察入微，八方自然追問佢點睇下任特首人選。
習副主席訪澳期間，記者都問過何鴻燊呢個問題，但嗰時佢話仲諗緊未有心水，點知過咗呢兩日就有答案。佢噚晚話，對澳門社會文化司司長崔世安「好有信心」，讚對方「好有學問，的確係澳門人，家庭非常好，喺澳門已經幾代。」咁其他熱門人選好似澳門檢察院檢察長何超明、行政會議成員賀一誠、經濟財政司司長譚伯源呢？賭王都唔理幾多，只係話崔世安呢位世姪做下任特首「成數高」。
熟悉澳門政圈嘅人士分析，雕通眼眉嘅何鴻燊睇好崔世安，極可能係收到風，阿爺已經初步選定崔世安接鏵哥棒。52歲嘅崔世安係澳門愛國家族崔德祺嘅姪仔，亦係何厚鏵屬意嘅繼任人選，一旦當選會延續鏵哥嘅路線，從某個角度嚟講大局會穩定啲。雖然有指若由司法系統出身嘅何超明做特首，有助經歷過歐文龍案嘅澳門打擊貪污，但中央可能唔想一下子對澳門衝擊太大。
但講到尾，邊個做澳門特首，我哋香港人固然只有八卦嘅份兒，連澳門人自己都冇say，講咁多都係嘥氣。
mailto:[email protected]