愛一個人要細水長流，但落到球場比賽，最忌就係鼻水長流！香港同歐洲呢排天氣好凍，唔知係咪影響到上周六歐洲各大聯賽都冷風四起，好多榜首隊「賴嘢」失分，英超利物浦就作客0:0悶和史篤城。最搞笑係謝拉特十足《喜劇之王》入面，周星馳扮演嘅尹天仇咁，俾鏡頭影到成日流鼻水，要係咁索係咁索，唔怪之得黑到連中兩次柱啦！
謝拉特兩做「柱男」
香港呢排好凍，搞到我求大俠呢輪都要攬住張被睇波，而歐洲最近亦成日落大雪，搞到好多比賽都要改期，進行得成嘅又要喺咁凍嘅環境下作賽，球員唔變雪條都會影響表現啩。利物浦貴為英超「1哥」，今輪作客升班馬史篤城諗住𡁻硬啦，點知天氣凍啫，原來場波都咁冷，搞到最後賽和0:0，同首循環賽果一樣。紅軍報唔到仇，捧場客咪又一樣，1.3倍客W就咁斷送咗。
家陣利物浦21戰得46分仲排緊榜首，就算次席車路士周日贏咗曼聯，都過唔到佢哋，暫時都叫保到個榜首位。對史篤城贏唔到雖然冇乜運，而嚟緊下周一（19日）聯賽打吡戰仲要主場對愛華頓，好彩紅軍都黑唔晒，對手屆時會有中場悍將費蘭尼停賽。只要謝拉特收晒鼻水，我睇呢位大賽巨星隨時又嚟料。
利物浦領隊賓尼廸斯賽後就話：「啲人成日話我哋未攞過英超，家陣排喺榜首又仲有積分優勢，點都有利吖！總之，我隊波好勁啦，我滿意佢哋表現喎，唔該費Sir唔好再講太多我哋嘅嘢喇！」睇嚟兩位教頭把口唔到季尾都唔會收。
英意法齊刮冷風
冷風上周六先吹襲英格蘭，除英超榜首利物浦失分之外，連英冠「1哥」狼隊都要主場1:3不敵普雷斯頓，1.55倍主W又係冇埋。吹完英格蘭，風向在深夜再轉意大利同法國，國際米蘭只係憑伊巴謙莫域嘅入球，主場迫和卡利亞里1:1。須知國米歇冬前聯賽8連勝，乜歇冬後反而再冷啲㗎？咁叫歇冬咩？1.22倍W都死埋！
死咗3個聯賽嘅榜首隊，最後連法甲大佬里昂都凍親球迷，又主場賽和羅連安特1:1。全球經濟已夠衰，啲波又咁冷，救命！