空置多時嘅火炭工業區工廠大廈，近年被一班藝術工作者進駐。呢班藝術工作者一連兩個周末周日搞咗個「伙炭藝術工作室」開放計劃，聯合區內唔同工廠大廈嘅工作室。市民只要揸住個小冊子，就可以按照指示去唔同地點參觀藝術品。
八方噚日都去趁熱鬧，對其中一間叫「被迫裸體工作室」最感興趣。
各位千祈唔好亂諗，負責人李鴻輝係新加坡人，佢話自己鍾意儲書，將工作室起咗個名叫StudioBibliotheque，即係圖書館咁解，讀起嚟好似「被迫裸體」，同佢本身着重慾望同空間嘅藝術概念好似，𠵱家佢嘅工作室做緊個展覽叫《對畫:香港角》，有興趣嘅可以喺嚟緊嘅周末周日去睇吓。