國家副主席習近平噚日結束澳門行程，離澳前都唔順道過嚟香港特區探吓班，相信最安樂嘅係煲呔，毋須戰戰兢兢去面聖。原來喺習副主席上周六抵澳前一晚，煲呔星期五放工後同太太去咗澳門參加私人聚會，聚會之後仲去咗沙梨頭嘅六記粥麵掃貨，買咗大量雲吞皮同竹升麵漏夜返港，避免同習副主席撞到正。
次次食麵都畀足錢
六記老闆李明佳同八方講，煲呔喺上周五晚飯時間後同太太雙雙出現。佢話煲呔兩夫婦係熟客，當年六記喺街邊擺檔時，出身澳門嘅曾太一家人已經成日嚟幫襯；就算𠵱家貴為特首夫人，都不時坐低嘆碗麵。但由於煲呔話當晚唔係好得閒，外賣就算。
佳哥當晚都有同煲呔傾偈，煲呔特別澄清話佢過澳門唔係同習副主席秘密見面，只係嚟參加私人派對。雖然係香港特首，佳哥話煲呔都好老實，次次都畀足錢，自己當然都係收足。特首辦證實煲呔上周五晚到過澳門參加私人聚會，但肯定冇同習副主席見面，因為習副主席未到，大家唔使亂估。