今年經濟會唔會反彈好難講，要未雨綢繆惟有節省開支，上市公司不外乎裁員減薪，但無可避免打擊士氣。內地《華夏時報》爆料話，喺深圳掛牌嘅「龍頭」地產股萬科集團，最近將年終獎金由上而下縮減，高層一個仙都冇，中層拎一半，低層照單全發。集團管理層主動「肥下瘦上」共度時艱，賣樓經紀睇怕都會受落。
王石料樓市有排差
睇番萬科08年盤數其實唔算差，賣咗557萬平方米樓，收番478.7億元人民幣，雖然按年跌咗9%，都叫做達成銷售目標。單計12月，表現仲好過預期，因為內地同胞鍾意買樓過年，而阿爺又放寬咗宏調政策，萬科嘅售樓面積同銷售金額，同11月份比大升50%。
不過萬科掌舵人王石就唔多樂觀。報道話，萬科原先睇房地產最多跌到年底，但𠵱家延後至2012年。王總睇市一向幾準，好似行內07年中一片好景，佢就話即將「拐點（即係U-Turn轉差）」，希望今次「醜嘅唔靈好嘅靈」啦。