正為財政預算案度橋嘅鬍鬚曾唔知係咪嫌政壇中人悶，冇乜新思維，改向演藝界人士埋手，頻頻同啲明星歌手藝人接觸，做騷之餘或者兼可搵靈感。兩星期前佢先喺官邸宴請樂壇新人MCJin歐陽靖，前日又請咗喺《葉問》一片中飾演葉問而人氣急升嘅甄子丹做座上客，令佢嘅官邸星味甚濃，搶咗近期霉味籠罩嘅禮賓府風頭。唔講唔知，原來計落鬍鬚曾仲係甄子丹師兄。
鬍鬚曾拜甄媽媽為師
甄子丹前日中午1點左右，同黃百鳴個女一齊坐七人車去到鬍鬚曾官邸。憑住《葉問》呢排好紅嘅甄子丹一直笑容滿面，個零鐘頭食飽飯後仲同鬍鬚曾一齊喺花園傾吓偈，甄子丹講到興起時不時手指指，絕對唔似新相識嘅朋友。之後兩個人又一齊去到now台接受大班訪問，一整日都好似孖公仔咁出入。
究竟甄子丹同鬍鬚曾有乜淵源？原來係同武術有關。據知佢哋兩個一齊喺波士頓玩大，私交甚篤，最重要係大家都係武術愛好者。鬍鬚曾年輕時更加拜過甄子丹媽咪為師，學習洪拳，計落兩人份屬師兄弟。若要論資排輩，鬍鬚曾更係甄子丹師兄，但好明顯師弟嘅真功夫應該喺師兄之上。
據知前日飯局上，兩人話題離唔開武術，仲談起少時往事。鬍鬚曾亦好識做，席間表明自己係師弟嘅忠實fans。原來甄子丹有份主演嘅《七劍》同《龍虎門》早前首映，鬍鬚曾都有應邀捧場，今次雖然無緣出席《葉問》首映，但都有自己揞荷包去戲院睇。過得兩招嘅鬍鬚曾據聞喺飯局上，不時同師弟講番《葉問》嘅劇情，講到眉飛色舞，仲大讚甄子丹打木人樁一段非常精采。
八方噚日問番甄子丹同師兄敍舊有乜感覺，甄子丹話呢餐家常便飯食得好開心，因為大家一齊喺唐人街長大，交情非常深，又大讚鬍鬚曾好勤力。呢排鬍鬚曾又搵林海峰一齊賣廣告，又搵著名漫畫家畫漫畫，話想市民就預算案畀多啲意見，噱頭盡出嘅佢，唔知遲啲會唔會搵埋師弟一齊耍番套拳嚟催谷預算案？
mailto:[email protected]