男人不愛「豬扒」，卻對吉列豬扒情有獨鍾，愛咬下去那「咔嚓」的快感，愛鬆軟的豬扒中澎湃的肉汁。吉列黑豚不是甚麼新鮮事，要玩新花款，日本近期流行將豬扒分拆再重組，切薄叠起再炸，仲要加埋芝士夾心，充滿新鮮感，立即加分！呢股吉列千層黑豚風終於吹到嚟香港啦！
記者﹕吳允冲
攝影﹕陳陶鈞
吉列香葱黑豚定食$138
醬汁內混有白蘿蔔蓉，日本人相信有清熱之效；青葱、蘿蔔夾埋黑豚肉入口清新，無咁油膩。定食包括麵豉湯，白飯和椰菜絲則同其他吉列專門店一樣免費任添，大方得很。
夾心千層不沾油
所謂千層黑豚，其實是將黑豚肉刨到像Parmaham般薄，再叠起來炸，混合肥肉和瘦肉，效果有如肉餅般，咬落特別鬆化juicy，但同時保留了豚肉的彈性及纖維，不會過腍。黑豚肉夾心可選芝士、蒜味、黑胡椒、生薑、紫蘇梅。做吉列，油溫要控制得好先會炸得脆而油份不會滲入豬扒，到最關鍵的「咔嚓」一聲就要看外皮的鬆脆度，炸得像刺針般豎起，筷子輕輕一碰已弄碎，就如破璃一樣，且不會皮肉分離。「近又」表示他們力求將日本的原味搬來香港，「麵包糠我哋都用日本貨，用日本麵粉、牛奶做出來的麵包糠，效果完全唔同。」連攝影師都讚味道同日本不遑多讓。
量產三元麥豚
「近又」採用的日本黑豚名為「三元麥豚」，每年產量得20萬隻，比其他黑豚養肥期長20日，又經放牧式飼養，肉質特別爽甜，三元麥豚只吃大麥和飲礦泉水，沒有豬臊味。主角黑豚了得，其他配角都不能小覷，米用日本越光米，亦可加$10轉十五穀，以玄米、紅豆、黑豆等15種穀物煮成，纖維豐富，更可另加咖喱汁、赤味噌汁、或山芋蓉撈飯。中國人熱氣會飲凉茶，日本人則吃椰菜絲，將新鮮的椰菜撈上醒胃的醬汁，可中和熱氣，更可解吉列的油膩感，店內獨有的「角切」椰菜與傳統的「千切」菜不同，保留了椰菜的脆口。
千層黑豚$148
千層黑豚肉汁豐富，就算擱凉了依然脆口、juicy。除了芝心，還有蒜味、紫蘇梅、黑胡椒、生薑夾心共5款選擇。其中以芝士受歡迎，來自澳洲的芝士味不過濃，可襯托出黑豚的味道，但缺點是很快變硬，沒有像mozzarella般煙韌的口感。
和牛漢堡定食$98
選用A5和牛，肉質不鬆散，充滿黑椒和洋葱味，但和牛味道不濃，比黑豚肉來得膩口，勝在價錢平。
滑蛋吉列黑豚定食$118
醬汁較甜，較接近日本人的口味，蛋汁滑溜不過老，很好送飯，屬店中熱賣top3。
女性之選定食$138
有北海道蝦、三色野菜卷、日本南瓜、蘆笋及枝豆薯蓉餅。推介枝豆薯蓉餅，具濃郁枝豆味又有咬口，不用蘸醬已很好吃。
近又黑豚專門店（23636633）
旺角亞皆老街8號朗豪坊L11層13舖
註：不接受訂位，每位顧客需最少惠顧一客定食。
長龍吉列元祖
經蔡瀾、倪匡大力吹捧後，人氣長年不減，訂位誇張到要兩個月前預約，walkin等一個鐘是閒事。又難怪，開業十幾年水準不改，吉列食材選鹿兒島黑豚、廣島蠔，師傅手勢好，豬扒鬆脆不油膩又juicy，配合手磨芝麻，香氣四溢，令不少粉絲定期去報到。要試最正宗的吉列豬扒，別無他選。
Tonkichi日本吉列專門店（25776617）
銅鑼灣告士打道280號世貿中心412室
平試吉列止癮
首名勇敢挑戰Tonkichi的挑戰者。若然平時你行開銅鑼灣Sogo，必定會見過人肉吉列豬扒派傳單。「豚組」位置就在Sogo對面，而且不用排隊訂位，一般價錢更比Tonkichi平約20%，啱晒突然間想食吉列又怕等的人。除黑豚外，推介吉列白鱔。
豚組（34282862）
銅鑼灣軒尼詩道502號黃金廣場7樓