「耳仔聽嘢唔清楚」
Theresa鼻敏感出碟撻Q - 馮仁昭

成班新晉歌手噚日去咗鑽石山廣場，出席一本雜誌嘅頒獎典禮，一大班歌手嘅支持者一早就霸晒位影靚相，搞到現場不知幾熱鬧。大會前前後後頒足29個獎，人人有份，真係皆大歡喜啦。其中傅穎（Theresa）攞到個「感性人氣女歌手」，馮仁昭同班行家笑佢係性感唔係感性，佢就話感性啱自己多啲，又話本身唔係行性感路線喎。

衞詩掃兩獎

Theresa又話空氣差搞到鼻敏感病發，佢話：「𠵱家連耳仔聽嘢都唔係好清楚，新碟爭一首歌都錄唔到，今次醫生畀我隻藥已經最犀利，如果都唔得就可能冇得救，到時要移民唔住香港喇。」
至於衞詩（Jill）就攞「矚目人氣女歌手」同埋「舞台型格女歌手」，阿Jill話攞呢兩個獎搞到自己好似好有型咁，又話新歌希望可以重唱偶像Sammi鄭秀文嘅快歌，仲自爆做Sammi演唱會嘉賓嗰陣緊張到眼尾都唔敢望人，俾同事笑咗一餐。