臨近年尾，各大商場換上賀年裝飾，為節日添氣氛，作為師奶最關心卻並非邊個場的裝飾靚，反而是邊個場的利是封最靚。各大商場近年可謂落重本，邀請大師級人馬設計一個小小的利是封，部份大場如海港城及時代更與往年一樣出同系列ClutchBag，讓阿媽輩派利是都「型」過人。一於做個街頭小調查，睇吓究竟邊個商場的免費利是封最得大家歡心？
記者：區佩嫦
攝影：譚盈傑
No.1海港城：攬撈肥娃
10個路人9個撐海港城的大頭肥娃，貪利是封上的BB肥頭耷耳，一套8款各有圖案，有的攬住金撈寓意年年金撈，有的睡在高跟鞋上寓意步步高升，得意可愛。這套名為ShoppingBaby利是封由新晉藝術家DorophyTang設計，又金又紅又紫，保證派的開心收的更開心。
鄭先生：自己好鍾意這款中國BB公仔，肥嘟嘟好可愛，利是封有燙金，幾High！
黃太：ClutchBag夠實用，利是封用古老和Modern相結合，好得意！
陳小姐：顏色吸引，大人細路見到都會鍾意！
Jess：唔似傳統利是封咁悶，最得意係每個利是封都有不同的祝福句，有心思。
周小姐：之前見到Poster已經覺得好吸引，夠Colorful，派的人和收的人都一樣開心。
日期：即日至1月25日（逢六、日）
換領：於海港城消費滿$800或以上（以2張即日發票計算），再捐$20予「香港血癌基金」
查詢：21188666
No.2荃灣廣場：金牛入屋
以Cute為賣點的荃灣廣場利是封（10個）印上Q版黃金屋，以為平平無奇？打開後，全間黃金屋佈滿大大小小的金牛，可愛到爆，若果入面都係「金牛」更加正！
陸太：外表好似無乜特別，打開後好得意好可愛，又好有意頭。
日期：即日起至1月25日
換領：於荃灣廣場消費滿$250（以單一即日機印發票計）
查詢：24171709
No.3太古廣場：古色屏風
與屏風結合成擺設的利是封，的確叫人驚喜，一套4個共兩款的利是封，套在屏風內作枱頭擺設，為家居添上新年氣氛。可惜一班師奶嫌唔實用，一來得4個太少，二來若做擺設便不能用，咁點好？
日期： 即日起至1月25日
換領： 於太古廣場購物滿$1,500（憑即日單據）
查詢： 28448988
No.4時代廣場：鑲石孔雀
落足重本！孔雀金色利是封（8長8短），最貴氣是身上鑲紫晶及戴珍珠頸鏈！師奶嫌太貴氣，封$10「妹仔大過主人婆」，等封大利是先會用。
日期：1月14日至18日
換領：於時代廣場購物滿$800（以2張即日發票計），再捐$20予護苗基金
查詢：21188900
No.5新世紀廣場：新鮮牛奶
新世紀廣場大賣無毒牛奶，利是封（4長4短）以可愛牛仔做嘜頭，備有紅色的士多啤梨味和金色的朱古力味揀，師奶們都讚可愛。而每日首300名換領的顧客更可獲贈限量版牛奶錢罌一個。
日期：即日起至1月25日
換領：於新世紀廣場消費滿$300（以2張即日發票計）
查詢：23970790
No.6荷里活廣場：剪紙福牛
水禾田設計的「剪紙福牛」利是封（4長4短），採「福牛」閃印技術。
日期：即日起至換完即止
換領：在荷里活廣場消費滿$200（以當日收據計）
查詢：21188811
No.7MTR商場：金牛屋
地鐵旗下商場的利是封（6個）以屋形代替方形設計，印上不同字款的「牛」字，但有師奶話怕放落袋易弄縐。
日期：即日起至1月25日
換領：於MTR旗下商場之指定商舖憑電子貨幣（信用卡、易辦事或八達通）單一消費滿$200即可參加「金牛送禮人人賞」即抽即中獎遊戲，有機會贏取利是封乙套
查詢：27500877（德福廣場）
No.8圓方：李志清福牛
金庸御用插畫家李志清的水墨「大福牛」利是封（10個），橫向設計。
日期：即日起至1月25日
換領：於圓方消費滿$500
查詢：27355234