由細聽到大嘅廟街王子尹光，原來未喺廟街唱過歌；MCJinRap爆香港情懷，大唱《上堂時間》：「去親廟街，啲同學就講歐陽靖WelcometoHongKong！」又原來，佢都未去過廟街。呢晚，佢哋兩個喺廟街對碰，吹得就吹口沫橫飛，街坊爭影相，中西白欖王加Rapper，好Friend。
記者：蒙為亮
攝影：梁細權
小檔案
尹光，千叮萬囑叫我寫佢50N歲，花朵「廟街王子」。七十年代出道，歌曲以詼諧惹笑為主，除改編歌曲還自己作曲填詞，作品如《七個小矮人》、《荷里活大酒店》、《日日輸光》、《數毛毛》、《數波波》屬經典中嘅經典，D歌《少理阿爸》仲拍埋MV，預計三月中會再踏紅館開個唱。
小檔案
歐陽靖，27歲，正宗ABC，19歲參加紐約BET有線電視節目舉辦嘅「FreestyleFriday」比賽，結尾唱一句：「你返屋企啦！」即成台主，之後蟬聯七次。佢憑《LearnChinese》成為第一位登上美國唱片榜嘅亞裔美國人，今年轉戰香港推出《abc》，二月推出第二隻廣東碟。
即場爆肚Battle
訪問開始之先，兩人先來兩三句客套，熱身過後即來一場Battle，恍如武俠小說中打擂台比武，數白欖加Rap，場面之轟烈前所未見。佢哋即場爆肚㗎，白欖王同Rapper幾乎字字押韻，聽到我同攝影師哥哥好興奮。
歐陽：今日有機會同你做訪問影相，我真係覺得好榮幸。由細到大，《七個小矮人》、《荷里活大酒店》、《肥婆隻雞甩晒毛》，首首歌我都聽到入晒腦。
尹：多謝，不過咁，你好似喺美國出世喎，咁都聽得到？
歐陽：你好多歌都喺港產片入面聽到，跟住再Findout究竟邊位前輩唱呢啲歌，原來就係你，哈哈。我爸爸都好鍾意你，佢話你好搞笑，啲歌詞又夠絕。
尹：講到歌詞，我唔及你哋班後生仔，我有睇頒獎禮呀，睇過你Rap，真係Rap得唔錯，幾時教吓我？
歐陽：哈哈，點敢啊？光哥你係前輩，我喺你面前細路仔啫，想你指教一下，畀啲意見就真……我問你做竹升，有乜嘢咁失禮，就算我係，你都咪當我食塞米……（隨即喺Beatbox都無嘅情況下Rap招牌作《abc》）
尹：真係長江後浪推前浪，你Rap啲嘢，比我當年數白欖，甚至《少理阿爸》都難好多……冚家High，High，High，無銀用又要躝街，爸爸Yo，Yo，Yo，少理阿爸正仆街！你老竇我十零歲就係Disco做DJ，我熱愛睇肉，點樣𠝹女我最熟……（邊打拍子邊笑，口噏噏開始嚟料，在場圍觀街坊不論老中青，人人睇到熱血沸騰拍手叫好，好一首幻D歌）
歐陽：哈，唔係喎……我覺得你啲講詞難好多喎。（忍住笑）
尹：點會呢？我嗰啲係正宗數白欖，當年仲要用木魚數，所以只能夠做到一拍一個字，頂籠係速度快啲，要唱得快啲。你啲Rap好唔同，一拍內隨時要Rap幾個字，所以講難，一定係你啲Rap難過我。
歐陽：啱，不過光哥你啲歌多元化啲喎，《少理阿爸》係D歌，《荷里活》、《一個癡膠線的少年》改編外國經典金曲，淨係聽歌詞已經好搞笑，好想問，究竟你點樣作詞？
尹：每次作詞，我都會諗定主題，好似《荷里活》同《十四座》就純搞笑居多，《少理阿爸》同《阿媽大減價》就想帶出訊息，用詼諧手法話畀年輕人知，屋企人好重要。
歐陽：歌詞有粗口喎。
尹：無，我從來唔寫粗口歌，就算係「仆街」呢個詞，喺六、七十年代嘅香港都係慣常用語。我作詞扭字、食字玩意境，語帶雙關，好似「無銀用又要躝街」呢句，𠵱家啲後生又真係無銀用嘛。（一眾圍觀MK男女大笑）
為港人打氣
唔難發現，每當經濟低迷，香港人失意嗰陣，啲搞笑歌就會一窩蜂標出嚟。無計，畢竟香港人利字當頭，有錢搵當然識得笑，經濟差咩，都想用笑麻醉自己，對此尹光同MCJin非常贊同，為香港人帶嚟歡笑，正正係佢哋2009年新目標。
尹：笑唔笑得出就唔敢包，不過做人釋懷啲，自然對世界睇得開，我今年三月會再開個唱，希望可以幫香港人打打氣，不過新歌就應該唔會作啦。
歐陽：點解？
尹：哈哈，𠵱家啲音樂咁新潮，我想作都作唔到。
歐陽：唔好咁講，所謂音樂嘅新鮮感，未必一定要成隻歌由頭到尾都係新曲新詞，有時玩吓Featuring都幾好，好似我Rap頭段，之後Mix埋《荷里活大酒店》幾句，跟住光哥你又可以讀白，我諗都幾得意。
尹：哈哈，咁都得？係唔係先？如果係我就再玩激啲，唔唱《荷里活大酒店》，我唱小調，咁你有無得玩先？
歐陽：同光哥一齊玩，點──調──都得啦。
尹：我想做啲正能量嘅嘢，笑吓唱吓又一日，人都精神啲。
歐陽：我呀，今年都27歲，覺得大個仔咗好多，唔再細路仔，諗住結婚生仔，所以最近寫緊隻歌叫《天生一對》，睇吓過年後出唔出得切。
尹：咁開心，真係恭喜晒喎，哈哈，可唔可以同埋我一齊玩先？
歐陽：你開到聲一定得，GivemeFive！（光哥嚟唔切反應，慢成拍兼好錯愕咁舉高隻手，講到美國文化，都係MCJin勝一籌）
竹升仔遊廟街
成個訪問都喺廟街搞掂，廟街文化好草根，有地道粵語流行曲CD舖、煲仔飯、懷舊夜總會、睇相佬、一樓一、麻雀館、鹹碟鹹書檔瓣瓣齊，用亂中有序形容廟街好貼切。尹光既有「廟街王子」稱號，一盡地主之誼帶竹升仔歐陽靖行廟街，啱晒數啦。
歐陽：廟街真係好多嘢睇，乜都有得賣，有啲似美國唐人街。光哥，好多途人會同你打招呼，你好熟廟街？
尹：其實都唔係好熟，我無喺廟街露天表演過，可能呢度啲老闆畀面啩，成日播我啲歌。
歐陽：哈哈，我都想有一日，可以有咁多人聽我嘅音樂，我覺得香港人，其實好有人情味。
尹：係呀，我做咗幾十年人，真係覺得香港最好，Jin，有無諗過留喺香港發展？
歐陽：呢個問題，上年都有好多人問過我，有啲人以為我出完隻《abc》就會返美國，其實我下年都會繼續留港發展，今次返香港，我買單程機票咋，喺唔喺香港落地生根就未知，不過喺香港工作我好Enjoy。
尹：「落地生根」呢個四字詞都識講，你都幾叻仔。
歐陽：雖然我係竹升仔，喺美國出世，讀英文，中文識聽唔識睇，不過屋企都係用Cantonese溝通，所以寫歌詞方面，應該無乜問題。
尹：哈哈，你又知唔知乜嘢叫「老樹盤根」？
歐陽：……唔係好知。（眾人大笑，我邊笑邊指住天后廟門前棵老榕樹，笑言：「呢啲咪老樹盤根囉。」MCJin好迷惘，睇住人笑又唔知發生乜事）
1.尹光帶MCJin感受廟街情懷，除參觀成人玩具店外，更帶佢食碗喳咋，逛唱片店嗰陣啱啱播緊《數波波》，有無咁橋呀？
2.唔係吹水，大把MK仔女拉住尹光影相。
3.尹光不愧為笑蛋，見到成人玩具地攤，即刻同MCJin大講不文笑話，可惜對白唔出得街。
4.《少理阿爸》MV，尹光一人分飾老竇、老母同囝囝三角，服未？（ http://www.youtube.com/watch?v=Qo9LQzR1Lds）
5.《一個癡膠線的少年》，又係爆笑之作。（ http://www.youtube.com/watch?v=DiMc_TSBea0）
6.早前喺《鐵甲無敵獎門人》，鍾舒漫同尹光搶啜乒乓波，不慎互咀九次。
7.第一隻唱碟《abc》，係今年話題作。
8.今年一月一日，MCJin憑《abc》踏上叱咤頒獎台，一Rap，在場氣氛即時High爆。
成個訪問好正，甚麼「錶你有無」、「食乜Lunch」皆隨口而出，尤其尾聲去到榕樹頭天后廟，光哥大大力拍MCJin膊頭話：「後生仔畀啲心機，到時個世界就係你哋㗎嘞。」MCJin微笑點頭。此情此景，令我聯想起星爺《喜劇之王》裏面嘅甜筒輝，喺天后廟前面收到廿蚊陀地，鴻爺讚佢一句：「嘩，呢個簡直係揚名立萬嘅第一步。」但願《少理阿爸》式草根幽默長存不死，起碼香港人無銀用之時，都仲識會心微笑，阿門。