上個禮拜尾，基金研究公司理柏出咗08年度強積金嘅表現成績表，傳媒粗略計算，每個打工仔輸咗3.2萬蚊。如果你嘅投資組合全部係高風險嘅股票基金，咁蝕得仲甘。同一時候，新聞報道，壹傳媒員工劃一減薪3.5%，敏妮第一時間諗，要快啲交稿，希望可以令蘋果同事早啲收工，月薪雖然減咗，但早啲做完嘢放工，平均時薪咪唔使減囉！
當然條數係咪咁計，敏妮唔知，但喺經濟差嘅時候，有實質上嘅幫助梗係好，冇嘅話，精神上支持相信都冇人會拒絕啩。
喺股市搵番損失嘅
講開減薪兼蝕錢，敏妮問其他同事，如果同時面對強積金輸錢兼要減薪，佢哋會點做？呢個問題冇特定答案，但就可以睇到唔同人嘅唔同性格。
好多女同事都話，人工少咗惟有各方面都慳啲使，少啲出街，等自己少啲機會使錢。至於光頭仔就話，要喺股市搵番唔見咗嘅。
敏妮成日都話，市況再差，股市都有升嘅股票，只係你有冇本事搵到。何況光頭仔善於炒期指，可以睇好亦可以造淡，拿揑得好，可能真係畀佢賺番損失咗嘅薪金同MPF。
當然同樣嘅說話，敏妮仲喺啲「爛賭」同事度聽到，例如要喺波、馬、六合彩度攞番輸咗嘅。敏妮唔敢潑冷水，但攞得番嘅相信冇幾個。不過，敏妮就睇好光頭仔，因為佢唔係順口開河，佢近排好認真跟股壇前輩學技術分析、學睇圖，趁市淡裝備自己。
休息等牛市重臨
其實面對逆境，唔同人有唔同做法。有人趁機休息，等牛市重臨，亦有人趁市淡反而更加發力，打好根基，希望機會嚟嘅時候，自己可以把握得到。
溫敏妮
http://wanmanli.com/blogs/