減薪裁員消息，幾乎日日都聽到，打工仔要積穀防饑，於是啲優惠券家陣變咗寶。據內地《北京晚報》報道，京城人自金融海嘯後，無論出街食飯、電髮美甲定換手機，都會先上網下載優惠券。
每周下載1.7萬次
報道引述雅虎口碑網嘅工作人員講，北京區內商店嘅優惠券，舊年3、4月時每星期只有萬多次下載量，家陣升到1.7萬次。畀折扣優惠或送嘢嘅，包括卡拉OK、美容、裝修、電腦同婚紗攝影等。
商舖以食肆最多，有間叫「喜派吉」嘅韓國自助餐廳，上年每日做得15張枱，自從10月中推出網上優惠券，家陣每日做到50枱客。香港雖然都有網上優惠券，但唔係咁流行，唔通香港人慳到唔出街食飯？
華華上中國優惠網八吓，見到香港人熟悉嘅連鎖店好似肯德基同必勝客，每個月都會推出新優惠券，內地市民印出嚟或下載到手機就用得，方便又慳錢，不失為海嘯求生嘅好方法。