上個禮拜五，印度爆出美國安然（Enron）事件翻版，當地資訊科技外判公司Satyam造假賬，虛報利潤，創辦人俾警方拉咗。公司唔單止俾印度證交所除牌，仲連累班員工俾銀行降低信用卡簽賬額。
信貸額無辜被削
據印度《BusinessLine》報道，當地兩大銀行ICICI同HDFC銀行，已率先向Satyam員工開刀，滙豐同花旗之後亦跟隨。
一名員工接受訪問時猛呻，話自己張信用卡原本簽賬信貸額有成20萬盧比（約3.4萬港銀），𠵱家俾銀行cut到得番4萬（約6400港銀），令佢冇得再簽賬。佢埋怨家陣份工已經唔穩陣，點解銀行仲要落井下石。聽講有員工更尷尬到簽卡時，先知自己張信用卡唔夠錢。不過，ICICI辯稱，咁做唔係針對Satyam嘅員工，只係因應信貸風險而採取防範措施，向股東交代咁話喎。