公佈語言微調方案後受到各方狂插嘅孫公噚日終於現身公開活動，記者們梗係問佢點回應來自四方八面嘅批評，向來有官場老油條之稱嘅孫公十年如一日，繼續講嚟講去三幅被，話香港作為國際城市同金融中心，梗係要加強學生學習英語能力；最重要係多啲用英文，唔好怕講雞腸。
點知呢頭叫人講雞腸，嗰頭孫公就歧視英文。話說孫公用廣東話答完六條記者提問後，懶理英文台記者嘅提問就轉身走人，激到嗰位記者紮紮跳，大鬧孫公叫人講英文，自己就連英文都唔肯答。
已經走緊嘅孫公聽到被人鬧點走得安樂，無奈之下惟有折返現場，但都係象徵式咁答完一條英文問題就鬆人。