古天樂、吳君如和鄭中基昨日宣傳賀歲片《家有囍事2009》，在戲中古仔和吳君如有咀戲，由於劇情需要兩人要在片場多角度咀完又咀，君如大讚古仔嘴唇質地不錯。
賀歲搞笑電影《家有囍事2009》一班演員昨日到荃灣宣傳，力谷票房，幾位主角包括古天樂、吳君如、鄭中基、夏春秋及新演員沈麗君等齊齊亮相，吸引不少市民圍觀。
事前唔需要刷牙
幾位演員即場和觀眾大玩遊戲搞氣氛，其中君如和沈麗君分兩組跟觀眾比賽插花，之後由君如父親夏春秋做評判，他笑說：「梗係君如嗰邊靚啲。」沈麗君昨日穿上心口開窿衫，更緊貼其他演員合照搶鏡。
問到古仔和君如拍咀戲前有否刷牙作準備，他笑說：「其實只係輕輕咁掂吓，所以唔需要刷牙準備，不過點都好過同黃百鳴咀嘅。」
古仔望票房大收
君如指古仔與她在戲中有親嘴鏡頭，她說：「因為要多角度拍好多take，拍得多先至知佢嘴唇嘅質地。」對於票房成績，古仔說：「希望好啲，今年經濟冇咁好，大家可能少去旅行，多咗人睇戲。」
鄭中基透露正籌備一部自演自導的警匪片，男主角有古天樂和張達明，至於有否其緋聞女友蔡卓妍（阿Sa）參演？他說：「個角色比較嚴肅同賢淑，我諗未必啱佢，𠵱家仲未諗到邊個做。」他表示這部電影有近2,000萬元製作費。
採訪：張俊銘
攝影：陳俊強