國家副主席習近平去咗澳門訪問，八方聽聞，國務院副總理王岐山下星期亦會嚟香港，出席19、20號喺會展舉行嘅亞洲金融論壇。論壇由貿發局主辦，煲呔、鬍鬚曾都應邀發表演講，據知，王岐山同煲呔會同台出現，但暫時未有安排具體活動。王岐山分管金融商務，最近主力同美國談判兩國貿易安排，香港事務唔係佢業務範圍，反而唔及佢之前做北京市長咁，每年都嚟香港招商。
仲等緊阿爺派糖
講番習近平去澳門，過往中央領導人訪問香港，澳門特首鏵哥都會嚟埋香港，喺啲相關場合亮相為中央撐吓場。習近平呢兩日訪問澳門一日跑幾場，香港特首辦同八方講，煲呔冇計劃去澳門參加活動喎。坊間講到今次習近平去開「澳門特首招聘會」咁滯，又唔關香港事，而且煲呔上個月先上京述職，𠵱家等緊阿爺派糖振興經濟，隔一陣又去求見盞俾人覺得太過擒青。仲有，香港特首去澳門見領導人，最經典場面當然係當年老董俾胡總面斥要「查找不足」，跟住過幾個月就腳痛走人，所以去澳門面聖可能唔係太老利。