早前8號仔電盈，取消過往每名員工年年都有嘅50蚊聖誕party津貼，搞到班員工牙痛咁聲，連帶士氣都受影響，矛頭仲直指小小超李澤楷，有人話佢做咗聖誕派對神偷。
嚟緊就快農曆新年，好多員工都昅實公司今年會唔會連開工利是呢個傳統都取消埋，工會友好早前都有就呢個問題向資方打聽，好彩得番嚟嘅回覆係「一切不變」。
唔知有幾多人試過新年時突然咁黑仔，電話壞咗要搵人上門修理，但電盈就要keep住一批員工返工。員工講，以往每逢年初一、初二同初三返工，都會有200蚊開工利是，返齊三日就有600蚊，新年流流都算和味，好多員工都驚住公司今年諗縮數，慳番呢筆利是開支。𠵱家公司釋除疑團，員工都話飲得杯落。